ඩ‍නේරිස් - 02-1

භීතියෙන් හා ම්ලේච්ඡ උත්කර්ෂයෙන් පිරි මංගලෝත්සවයක් මධ්‍ය‍යේ ඩනේරිස් ටාර්ගේරියන් ඛාල් ඩ්‍රෝගෝ සමගින් විවාහ වූවා ය. උත්සවය සඳහා පෙන්ටොස්හි ප්‍රාකාරයට පිටතින් වූ හිස් භූමි භාගයක් තෝරා ගැනුනේ මිනිසකු ගේ ජීවිත‍යේ සෑම වැදගත් අවස්ථාවක්ම විවෘත ආකාශය යට සිදුවිය යුතු යැයි යන ඩොත්රැකි විශ්වාසය අනුව යමිනි.

තමා හා එක්වන්නැයි ඩ්‍රෝගෝ ගෙන් ලද ආරාධනයට අනුව ඔහු ‍ගේ ඛලසාරය විවාහ මංගලෝත්සවය සඳහා පැමිණ සිටියහ. හතලිස් දහසක් වූ ඩොත්රැකි රණකාමීන් හා ගිනිය නොහැකි තරම් වූ ගැහැණුන්, දරුවන් හා වහලුන්! සිය සතුන් රංචුද සමගින් නගර ප්‍රාකාරයට පිටතින් කඳවුරු බැඳගත් ඔවුහු වියූ තණවලින් සෑදු නිවාස වලට වී අතට හසුවන සෑම දෙයක්ම කමින් බොමින් සතුටු වන්නට වූහ. ගෙවෙන සෑම දිනක් පාසාම පෙන්ටොස්හි යහපත් පුරවැසියන් සියල්ලන්ම දිවි ගෙවන්නට වූයේ තැවිලි සහගත සිතිනි.

"මගේ සහායක මැජිස්ටර්වරුන් නගරයේ ආරක්ෂාව දෙගුන කරලයි තියෙන්නෙ." ඉල්ලීරියෝ දිනෙක පැවසූයේ ඩ්‍රෝගෝට අයත්ව තිබූ මන්දිරයේ රාත්‍රි භෝජනයකට සහභාගි වෙමිනි. ඛාල් සිය ඛලසාරය සමග එක්වී තිබුනු අතර ඔහු ගේ වතුයාය මංගල උත්සවය පැවැත්වෙන දා වන තෙක් ඩනේරිස් හා ඇය ගේ ‍සොහොයුරා ගේ පෞද්ගලික පරිභෝජනය වෙනුවෙන් වෙන් කර දී තිබින.

"නගර වැසියො තමන්ගෙ නගරෙ වස්තුවෙන් බාගයක් කුලී හේවායින්ටයි චන්ඩින්ටයි දීලා දාන්ට ඉස්සෙල්ලා ඩනේරිස් කුමාරිව බන්දලා දෙන එක හොඳයි කියලයි මම නම් හිතන්නෙ." සෙර් ජෝරා මෝර්මන්ට් විහිළු ස්වරයෙන් කීවේ ය. ඩැනීව ඛාල් ඩ්‍රෝගෝට විකිණුනු දා රැයේ මේ පිටුවහල් වුනු නයිට්වරයා සිය අසිපත ඇ‍‍ගේ සොහොයුරා ‍ගේ සේවය වෙනුවෙන් පුදකර තිබින. විසේරිස් එය මහත් කැමැත්තෙන් බාර ගත්තේ ය. එදා පටන් මෝර්මන්ට් නිතරම ඔවුන් ගේ සමාගම‍යේ ගැවසෙන්නෙකු විය.

මැජිස්ටර් ඉල්ලීරියෝ මඳ සිනහවක් පෑ නමුදු විසේරිස් එපමණවත් සිනාසුනේ නැත. "ඌ කැමැතිනම් ඌට හෙට වුනත් එයාව ගන්ට පුළුවන්, ඌ නියමිත මිල ගෙවන්ට සූදානම් නං." විසේරිස් ඈ දෙස බැල්මක් හෙලූ අතර ඩැනී දෙ‍නෙත බිමට නැඹුරු කරගත්තා ය.

ඉල්ලීරියෝ කුසීත අයුරින් අතක් වැනුවේ ය. "මම ඔබට කිවුවනේ. හැම දෙයක්ම පිළියෙල වෙලයි තියෙන්නෙ. මාව විශ්වාස කරන්ට. ඛාල් ඔබට සිංහාසනයක් පොරොන්දු වෙලයි තියෙන්නෙ. ඒක ඔබට ලැබෙයි."

"ඒක හරි. ඒත් කවදද?"

"ඛාල් තීරණය කරපු දවසට." ඉල්ලීරියෝ කීය. "මුලින්ම මිනිහට දැරිවිව දීලා ඉමුකෝ. ඒ දෙන්නා බැන්දට පස්සෙ ඛාල් එයාගෙ පිරිවරත් එක්ක තැනිතලාව හරහා ගිහිල්ලා ඇයව ඉදිරිපත් කරන්ට ඕන වයෙස් ඩොත්රාක්වල ඉන්න ඩොෂ් ඛලීන්ට. ඊට පස්සෙ සමහරවිට. නිමිති කාරයො කිවුවොත් යුද්ධෙට යන්ටයි කියලා."

නොඉවසිල්ල නිසා විසේරිස් ගේ කෝපය නැග ආවේ ය. "මේ ඩොත්රැකි නිමිති කාරයන්ගෙන් මට පඩයක් වත් වැඩක් නෑ. රාජ්‍යය පැහැරගත්ත එකා මගේ තාත්තගෙ සිංහාසනයෙ වාඩි වෙලා ඉන්නවා. මම තව කොච්චර කල් ඉවසන්ටද?"

ඉල්ලීරියෝ දෙවුර ඇකිළුවේය. "ඔබ ජීවිත කාලයෙන් වැඩිහරියක් ඒ වෙනුවෙන් බලා හිටියා. ඉතින් තව මාස කීපයක්, නැත්තම් තව අවුරුදු කිපයක් ඉවසගෙන ඉන්න එක මහ වැඩක්ද?"

වයෙස් ඩොත්රාක් තරම් ඈතට සංචාරය කර අත්දැකීම් ඇතිව සිටි සෙර් ජෝරා එකඟතාව පලකරන අන්දමින් හිස වැනී ය. "මම උපදෙස් දෙනවා ඔබට පොඩ්ඩක් ඉවසලා ඉන්ටයි කියලා මගේ ස්වාමිනී. ඩොත්රැකි‍යො කියාපු වචනයක් ඇත්නම් ඒක ඒ විදියටම ඉටු කරනවා. ඒත් එයාලා ඒක කරන්නෙ එයාලට උවමනා වෙලාවටයි. සාමාන්‍ය මිනිහෙකුට ඛාල්ගෙන් අනුග්‍රහයක් ඕන කියලා යටහත්ව ඉල්ලා හිටින්ට පුළුවන්. ඒත් එයාට ඒ වෙනුවෙන් කරදර කරන්ට, බැන වදින්ට යන්ට හොඳ නෑ."

විසේරිස් කේන්තියෙන් පිම්බේ ය. "උඹේ කට පරිස්සම් කරගනින් මෝර්මන්ට්. නැත්තම් මම උඹේ දිව එළියට ඇදලා දානවා. මම සාමාන්‍ය මිනිහෙක් නෙවෙයි. මම තමා රාජධානි සප්තකයේ නියම උරුමක්කාරයා. මකරු කවදාවත් කාගෙන්වත් යටහත්ව ඉල්ලා හිටින්ට යන්නෙ නෑ."

සෙර් ජෝරා ගරුසරු ඇති අයුරින් සිය දෑස් බිමට හරවා ගති. ගුප්ත සිනහවක් පෑ ඉල්ලීරියෝ අත දිගුකර පළහන ලද තාරාවාගේ තටුවක් ගලවා ගත්තේ ය. 'තව දුරටත් මේ ලෝකෙ මකරු නෑ' සිය සොයුරා දෙස බලමින් ඩැනී සිතුවා ය. එනමුදු එය වදන්වලට පෙරලන්නට ඇයට උවමනා වූ‍යේ නැත.

එනමුදු එම රැයේ ඇය සිහිනෙන් මකරෙකු දුටුවා ය. විසේරිස් ඇයට තලමින් ඇයට රිදවමින් සිටියේ ය. ඇය සිටියේ නිරුවතින් හා බියෙන් ගැහෙමිනි. ඔහු වෙතින් ඉවතට දිව යෑමට ඇය යත්න දැරූවද සිය සිරුර ස්ථුල හා අශෝබන මෙන්ම තමන්ට අවනත ‍නොවන බැව් ඇයට හැඟිනි. ඔහු නැවතත් ඇයට තැලී ය. දෙපා පැටලුනු ඇය බිම ඇද වැටුනා ය. "උඹ මකරාව නැගිට්ටෙවුවා." ඇයට පා පහර එල්ල කරන අතරතුරේ ඔහු කෑ ගැසීය. "උඹ මකරාව නැගිට්ටෙවුවා. උඹ මකරාව නැගිට්ටෙවුවා." ඇගේ කලවා රුධිරයෙන් පෙඟී ගොස් තිබින. දෑස් වසා ගත් ඇය වේදනාවෙන් ඉකිබිඳින්නට වූවා ය. ඇගේ හැඬුමට පිළිතුරක් මෙන් මහ හඬින් යමක් ඉරෙන හඬත් බුර බුරා නැගෙන ගින්නක හඬත් ඇයට ඇසින. ඇය නැවත සිය දෑස් විවර කල විට විසේරිස් පෙනෙන්නට නොසිටියේ ය. දැවැන්න ගිනි වළල්ලක් ඇය වටා නැගෙන්නට වූ අතර ඒ ගින්දර මැද මකරා සිටියේ ය. ඌ සිය දැවැන්ත හිස සෙමින් හරවා ඈ දෙස බැලී ය. උ‍ගේ ගිනිගෙන දැවෙන දෑස ඇගේ දෑස් හා සම්මුඛ වූ මොහොතේ ඇය වෙවුලමින් දහදියෙන් ‍පෙඟී ගිය ගතින් යුතුව අවදි වූවා ය. ඇය වෙන කිසිදු දිනෙක එතරම් බියපත් නොවීය........

........ අන්ති‍මේදී ඇගේ විවාහ මංගල දිනය පැමිනි දා තෙක්, එතරම් බියපත් නොවීය.

හිරු උදාවේ ඇරඹුනු උත්සවය හිරු අවරට යන තෙක්ම නිමා නොවී ය. ඩොත්රැකියන් ගේ තෘණමය නිවාස අතරේ පස්වලින් දැවැන්ත වේදිකාවක් ඉදිවී තිබුනු අතර ඩැනී එහි ඛාල් ඩ්‍රෝගෝ සමගින් අසුන් ගෙන සිටියා ය. ඇය කිසි දිනෙකත් මෙතරම් මිනිසුන් සමූහයක් එක් රැස් වී සිටින ආකාරය දැක නොතිබින. එමෙන්ම කිසි දිනෙකත් මෙතරම් ආගන්තුක මෙතරම් බියජනක මිනිසුන් සමූහයක් ද දැක නොතිබින. ‍මේ ඩොත්රැකි අස් හිමියෝ නිදහස් නගරවල සැරි සරද්දී සාමාන්‍ය මිනිසුන් පරිද්දෙන් වර්ණවත් සළුපිළියෙන් සැරසී විලවුන් ගත දවටා සිටිය ද සිය ඛලසාරය සමගින් සිටින විට ඔවුන්ට හුරුපුරුදු පැරැණි රටාවටම ඇඳුම් පැළඳුම් කලහ. ගැහැණුන් හා පිරිමින් සැවොම ‍පොදුවේ වර්ණවත් සම්වලින් නිමවූ කබාවලින් උඩුකය වැසූ අතර අශ්ව ලොමින් කල කලිසම් හැඳ සිටියහ. රණකාමීන් සිය ගොතන ලද දිගු වරලස තෙල් ගල්වා අලංකාර කර තිබින. ඔවුහු මී පැණියේ හා ගම්මිරිස්වල බහා පලහන ලද අශ්ව මාංශ ගිල දමමින්, පැසවන ලද වෙළෙඹි කිරෙන් නිපදවූ මධ්‍යසාරය හා ඉල්ලීරියෝ විසින් ගෙන එන ලද වයින් බොමින්, ගිනිමැල වටා වාඩි වී උස් හඬින් නර්මාලාප දොඩමින් සිටියහ.

ඇයට පහතින් වූ අසුනක විසේරිස් වාඩි වී සිටි අතර ඔහු පසෙකින් ඉල්ලීරියෝ හා සෙර් ජෝරා අසුන් ගෙන සිටියහ. එය ඛාල් ගේ රුධිරාරක්ෂකයින්ට වහාම පහළින් තිබුනු ගෞරවනීය ආසනයක් වුවද සිය සොයුරා ‍ගේ එළ නිල් පැහැ දෑසේ වූ කේන්තිය ඩැනී පැහැදිලිවම දුටුවා ය. ඇයට පහළින් වාඩි වී සිටීම ඔහු නුරුස්සන්නක් බැව් ඇය දැන සිටියා ය. වහලුන් විසින් සෑම ආහාර පලඟානක්ම පළමුව ඛාල්ට හා ඔහු ගේ මනාලියටත්, ඉන්පසු තමන් වෙතටත් පිරිනමනු දකින විසේරිස් කේන්තියෙන් පිඹිනු ඈ දුටුවා ය. එනමුදු සිය අමනාපයට හා කේන්තියට පොහොර දමනු මිස වෙනෙකක් කරන්නට ඔහු‍ට ඉඩක් නොවී ය. ‍ගතවන සෑම පැයක් පාසාම, ඔහු ගේ ගරුත්වයට හානි වන සෑම දෙයක් පාසාම ඒ අමනාපය ‍කෙමෙන් දළු ලා වැඩෙනු ඈ දුටුවා ය.

මේ සුවිසල් ඩොත්රැකි රංචුවට මැදි වී අසුන් ගෙන සිටිද්දී දැනුනු තනිකම තරම් තනිකමක් ඩැනී කෙදිනකවත් අත් විඳ නොතිබින. සිනාවකින් මුව සරසා සිටින්නැයි ඇගේ සොයුරා ඇයට උපදෙස් දී තිබුනු අතර මුහුණ ඇදුම් කද්දී ‍වේදනාව නිසා සිය දෑසට කඳුළු පුරා එද්දී පවා ආයාසයෙන් මුවට නගා ගත් සිනාව නවතා ගැනීමට ඇය වෑයම් නොකලා ය. හැකි උපරිම අන්දමින් සිය දෑසට නැගුනු කඳුළු වසන්කර ගැනීමට ඩැනී යත්න දැරුවේ ඇය හඬනු දුටුවොත් විසේරිස් කොපමණ කේන්ති ගන්නේ දැයි දැන සිටි බැවිනි. එමෙන්ම ඛාල් ඩ්‍රෝගෝ ඊට කෙසේ ප්‍රතිචාර දක්වනු ඇත්දැයි නොදැන සිටි බැවිනි. ඇය වෙත නොයෙකුත් රසමසවුළු පිළිගැන්වුනු නමුදු ඇය අත වනා ඒ සියල්ල ප්‍රතික්ෂේප කලා ය. අද දිනයේ කිසිදු කෑමක් සිය උගුරෙන් පහළට යැවිය නොහැකි බැව් ඇය දැන සිටියා ය.

ඇයට කතා කිරීමටවත් කිසිවකු නොවී ය. ඛාල් ඩ්‍රෝගෝ මහ හඬින් විධාන නිකුත් කරමින්, සිය රුධිරාක්ෂකයින් සමග විහිළු තහළු කරමින්, ඔවුන් ගේ සරදම්වලට සිනහවෙමින් දවස ගතකලද තමා පසෙකින් සිටි ඩැනී දෙස එකදු බැල්මක්වත් නොහෙලී ය. කතා කිරීමට අවශ්‍ය වූවද ඔවුන් දෙදෙනාට කතා කල හැකි පොදු භාෂාවක් ද නොවී ය. ඩොත්රැකි යනු ඇයට කිසිසේත්ම තේරුම්ගත නොහැකි රළු බසක් විය. නිදහස් නගරවල ව්‍යවහාර වුනු වැලීරියන් මූලයක් සහිත ග්‍රාම්‍ය භාෂාවේ වචන කිහිපයක් පමණක් ඛාල් දැන සිටි අතර රාජධානි සප්තකයේ භාවිත වුනු පොදු භාෂාව කිසිසේත්ම නොදත්තේ ය. ඉල්ලීරියෝ සහ සිය සොයුරා සමග කතා කිරීමට ඉඩක් ලද්දේනම් එය සතුටින් භාර ගැනීමට ඇය සූදාණම් වුවද ඔවුන් සිටියේ ඇයට පහතින් ඇයව නෑසෙන මානයේ වූ බැවින් ඊටද ඉඩක් නොවී ය.

ඉදින් මනාළි ඇඳුමින් සැරසුනු ඩනේරිස් කෑම කටක් කෑමට පවා බියෙන්, මී පැණි මුසු කල වයින් කුසලානක් තොලගාමින්, බිය නැති කරගැනීම පිනිස තමාටම නිහඬව කතා කරමින් සිය මංගල දිනය ගතකලා ය. 'මම තමා මකරාගේ රුධිරය' ඇය නිහඬව මිමිනුවා ය. 'මම තමා ඩනේරිස් ස්ටෝර්ම්බෝර්න්, ඩ්‍රැගන්ස්ටෝන්හි කුමරිය', 'මම ජයග්‍රාහක ඒගන් ගේ ලෙයින් හා බීජ‍යෙන් ඉපදුන කෙනෙක්'. ඇය දිගින් දිගටම මිමිනුවා ය.

Daenerys Targaryen: “Tell Khal Drogo that he has given me the wind.”