Wednesday 10 December 2014

කැට්ලින් 07-2


මොහොතකට පසු සටන්කරුවන් දෙදෙනා උද්‍යානයේ ප්‍රතිවිරුද්ධ දොරටුවලින් ඇතුළු වූහ. නයිට්වරයා තරුණ සහචරයින් දෙදෙනෙකු සමග පැමිණි අතර කුලී හේවායා ඉයරිහි ප්‍රධාන සටන් පුහුණුකරු සමග පැමිණියේ ය.

සෙර් වාර්ඩිස් ඊගන් කේශාන්තයේ සිට පාදාන්තය තෙක් වානේවලින් වැසී සිටියේ ය. ඝනකම් යට කබායක් සහ මුදු සන්නාහයට පිටතින් බරැති ඵලක සන්නාහයෙන් සැරසී සිටි ඔහුගේ පපුව සහ උරහිස් අතර දුර්වල සන්ධිය ආවරණය කරමින් අඩසඳ සහ උකුස්සා කැටයම් කල සන්ධි ආවරණ පළඳවා තිබින. ගෙල වටා ඝනකම් ග්රීවාවරණයක් වූ අතර ඉණේ සිට කළවේ අඩක් දක්වා වැටුනු වානේ සායක් මගින් යටිකය ආවරණය විය. ශිරස්කයේ ඉහළින් උකුසු පිහාටු විහිදී ගිය අතර එහි මුහුණු ආවරණය අවට බැලීමට පටු විවරයක් සහිතව උල් වානේ හොටකින් යුතු උකුස්සෙකු මෙන් නිම කර තිබින.

බ්‍රොන් කෙතරම් සැහැල්ලු සන්නාහයෙන් සැරසී සිටියාද යත් නයිට්වරයා සමග සසඳන විට ඔහු නිරුවතින් සිටියා වැන්න . ඔහු පැළැඳ සිටියේ පදම් කල සම් කමිසයක් සහ කළු මුදු සන්නාහයක් පමණි. ඊට අමතරව හිස වසා පැළැඳි මුදු සන්නාහය හා ග්‍රීවාවරණයට පිටතින් නාසාවරණයක් සහිත වානේ හිස්වැස්මක් පැළැඳ සිටියේ ය. දෙපා වසා සිටි උස බූට් සපත්තු හා වානේ පා ආවරණයන්ගෙන් දෙපයට යම් ආරක්ෂාවක් සැපයුනු අතර කළු පැහැ යකඩ කැබැලි ඔහුගේ අත්වැසුම් වලට තබා මසා තිබුනි. එනමුදු කැට්ලින් හට පැහැදිලිව පෙනී ගිය පරිදි බ්‍රොන් නයිට්වරයාට වඩා වසර පහළොවක් පමණ තරුණ විය, අඩි බාගයක් පමණ උස් විය, ඔහුගේ අසිපත් පහර නයිට්වරයාට වඩා දුරකට එල්ල කල හැකි විය.

ප්‍රතිමල්ලවයින් දෙදෙන එකිනෙකා දෙස බලාගෙන, ටිරියන් ලැනිස්ටර්ව මැදි කරගෙන ප්‍රතිමාව අසල දණ නැමූහ. පූජකවරයා ඔප දැමු පලිඟු ගෝලයක් සිය ඉණෙහි වූ සුමුදු සළුවක් තුලින් ඇදගත්තේ එය ඉහළට එසවූයේ ය. පළිඟු ගෝලය හරහා වර්තනය වූ ආළෝකය පුංචි යකාගේ මුහුණ හරහා දේදුනු රටා මැවීය. පූජකයා ගලායන උච්ච ගාම්භීර ගීතමය ස්වරයකින් අමතමින්, දෙවියන් මෙම සටනට සාක්ෂි දරන ලෙස ද, චූදිතයාගේ මනස තුලට එබී බලන ලෙස ද, ඔහු වැරැදිකරු නම් මරණය ද නිවැරැදිකරු නම් නිදහස සහ ජීවිතය ද ලබා දෙන මෙන් ඉල්ලා සිටියේ ය. ඔහුගේ හඬ අවටවූ කුළුණු වටා දෝංකාර දෙන්නට විය.

අවසාන දෝංකාරයද නිමා වූ පසු පූජකවරයා පලිඟු ගෝලය පහත් කරගත්තේ ඉක්මනින්ම එතැනින් පිටව ගියේය. මුරසෙබළුන් විසින් ඉවතට කැටුව යාමට පෙර ටිරියන් ඉදිරියට නැමී බ්‍රොන් ගේ කණට යමක් කෙඳිරුවේ ය. සිය දණහිසේ ඇලුනු තණපතක් පිස දා හැර මහහඬින් සිනාසුනු බ්‍රොන් නැගී සිටියේ ය.

ඉයරිහි උතුමානන් සහ මිටියාවතේ ආරක්ෂකයා වන රොබර්ට් ඒරින් සිය අසුනේ ඇඹරෙමින් සිටියේය. "මෙයාල කොයි වෙලාවෙ ද සටන් කරන්නෙ?" ඔහු නොඉවසිලිමත් ස්වරයෙන් ඇසුවේය.

සෙර් වාර්ඩිස් ගේ සහචරයකු විසින් ඔහුට නැගී සිටීමට උදව් කරන ලදී. අනෙකා යකඩයෙන් සවිමත් කල, අඩි හතරක් පමණ උසැති, බරැති ඕක් ලීයෙන් නිමවුනු ත්‍රිකෝණාකාර පලිහක් ඔහු වෙත රැගෙන ආවේය. ඔවුන් දෙදෙන එක්ව එය සෙර් වාර්ඩිස් ගේ වම් අතට තබා පටි තද කර දැමූහ. ලයිසා ගේ ප්‍රධාන සටන් පුහුණුකරු විසින් බ්‍රොන් වෙතද එවැනිම පලිහක් ලබාදුන් විට ඔහු පසෙකට කෙල පහරක් ගසා එය ප්‍රතික්ෂේප කලේය. දින තුනක් පැරැණි රැවුලක් ඔහුගේ ගෙල සහ කම්මුල් වසා පැතිර තිබුනි. ඔහු එය කපා නොදැමීමේ හේතුව කුමක් වුවත් ඒ තියුණු පිහියක් නොමැති කම නිසා නම් විය නොහැක. මක්නිසාද යත් ඔහුගේ අසිපත දැලි පිහියක් තරම් තියුණු මුවහතකින්, ස්පර්ශය පවා අනතුරුදායක වන තරමට දිනපතාම පැය ගණනක් තිස්සේ මුවහත් තබන බව බැලූ බැල්මටම පෙනෙන තරමේ මුවහතකින් යුක්ත වූ බැවිනි.

සෙර් වාර්ඩිස් වානේ අත්වැසුම් ලූ සුරත දිගු කල අතර ඔහුගේ සහචරයා විසින් දෙපැත්ත කැපෙන දිගු අසිපතක් ඔහුට ලබා දුන්නේ ය. එහි තලය සියුම් කඳුකර අහසක දර්ශනයකින් කැටයම් කර අලංකාර කොට තිබුනි. මිටෙහි අග කොටස උකුසු හිසක් ලෙස ද හරස් ආවරණය උකුසු තටු ලෙස ද නිමවා තිබින. "ඕක මම කිංග්ස් ලෑන්ඩින්ග්වලදී ජොන්ටම කියල හදවපු එකක්." සෙර් වාර්ඩිස් අසිපතින් වාතය පෙති ගසමින් පුහුණුවන අත‍රේ ලයිසා ආඩම්බර ස්වරයෙන් රැස්ව සිටි පිරිසට උදම් ඇනුවාය. "එයා රජතුමා වෙනුවට යකඩ සිංහාසනයේ වාඩිවෙන හැම වෙලාවේම ඒක පැළැඳුවා. ඒක හරී ලස්සනයි නේද? මම හිතන්නේ ජොන් ගේ මරණයේ පලිය ජොන් ගේ කඩුවෙන්ම ගන්න එක හොඳට ගැලපෙනවා."

කැටයම් කල රිදීවන් අසිපත ඇත්තෙන්ම සුන්දර වස්තුවක් විය. එනමුදු කැට්ලින් හට සිතුනේ සෙර් වාර්ඩිස්ට ඔහුට හුරුපුරුදු ඔහු ගේ අසිපතෙන්ම සටන්කිරීමට ඉඩ හලේ නම් එය වඩා පහසු වීමට තිබුනු බවකි. නමුත් ඇය කිසිවක් නොකීමට වග බලා ගත්තා ය. සිය සොයුරිය සමග කිරීමට සිදුවුන නිෂ්ඵල වාද විවාද වලින් ඇය වෙහෙසට පත්ව සිටියාය.

"එයාලව සටන් කරවන්ටකෝ." රොබට් උතුමානන් කෑගැසුවේ ය.

සෙර් වාර්ඩිස් රොබර්ට් උතුමානන් දෙස බලා අසිපත ඔසවමින් ආචාර කලේය. "ඉයරි සහ මිටියාවත වෙනුවෙන්!"

ටිරියන් ලැනිස්ටර් උද්‍යානයෙන් එහා පිහිටි සඳලුතලයක මුර පිට හිදුවනු ලැබ සිටියේ ය. බ්‍රොන් ඔහු දෙසට සමච්චල් සහගත ආචාරයක් පුද කර සිටියේ ය.

"එයාලා බලාගෙන ඉන්නේ ඔයාගේ අණ ලැබෙනකල්." ලයිසා ඇගේ පුතුට පැවසුවා ය.

"සටන් කරන්ට." වෙවුලන දෑතින් අසුනේ ඈඳි අල්ලා ගත් කොලුවා කෑගැසුවේ ය.

පලිහ ඉහළට ඔසොවාගත් සෙර් වාර්ඩිස් කරකැවුනේ ය. බ්‍රොන් ඔහුට මුහුණ පෑවේය. එකිනෙකා පිරික්සන්නාක් මෙන් අසිපත් දෙක වරක් දෙවරක් එකිනෙක හා ගැටුනි. කුලී හේවායා අඩියක් පසු පසට තැබුවේය. පලිහ ඉස්සර කරගත් නයිට්වරයා ඔහු වෙත පැමිණියේ ය. ඔහු හරස් කැපුමක් එල්ල කලද බ්‍රොන් පසුපසට පැන්න අතර රිදීවන් තලය වාතය පමණක් කපා දමමින් ඇදී ගියේය. බ්‍රොන් කවාකාර අයුරින් දකුණු දෙසට යන්නට විය. සෙර් වාරිඩ්ස් ඔවුන් දෙදෙනා අතර පලිහ තබාගනිමින් බ්‍රොන්ව හඹායන්නට විය. අසමතුලිත භූමිය මත ප්‍රවේශමින් පා තබමින් නයිට්වරයා ඉදිරියට ඇදුනු අතර තොල් මත රැඳුනු සිහින් සිනහවක් සමගින් කුලී හේවායා පසුබැස්සේ ය. නැවතත් සෙර් වාර්ඩිස් එල්ල කල පහරට හසු නොවනු පිණිස බ්‍රොන් පාසි වලින් වැසුණු මිටි ගලක් උඩින් සැහැල්ලු ලෙස පසෙකට පැන්නේ ය. ඊළඟ මොහොතේ බ්‍රොන් නැවතත් කවාකාර මගක යමින් නයිට්වරයා ගේ පලිහෙන් නොවැසුනු, අනාරක්ෂිත වම් පැත්තට ගමන් කලේය. සෙර් වාර්ඩිස් ඔහු ගේ පාදවලට පහරක් එල්ල කලද අසිපත් මානය ඊට දිගු මදි විය. බ්‍රොන් රිද්මයානුකූල අයුරින් තවදුරටත් වම් පැත්තට ගමන් කලේය. සෙර් වාර්ඩිස් එක තැන කැරකුනි.

"මේ යකා බයගුල්ලෙක්නෙ." හන්ටර් උතුමානන් ගුගුලේය. "එකතැනක ඉඳන් සටන් කරහං බයගුල්ලෝ!" තවත් කටහඬවල් එයම ප්‍රතිරාවය කලේය.

කැට්ලින් සෙර් රඩ්‍රික් දෙස බැලුවා ය. ඇගේ ප්‍රධාන සටන් පුහුණුකරුවා හිස සැලීය. "ඌට ඕනකරලා තියෙන්නෙත් සෙර් වාර්ඩිස්ව එයා පස්සෙන් පන්නගන්ට තමා. ඔය සන්නාහයේ බරටයි පලිහේ බරටයි මේ ලෝකේ ඉන්න ශක්තිමත්ම මිනිහා උනත් ඉක්මනින්ම වෙහෙසට පත්වෙනවා."

මිනිසුන් සටන් පුහුණුවන ආකාරය කැට්ලින් විසින් සිය දිවිය පුරා සෑම දිනකම පාහේ දැක තිබුනු හුරුපුරුදු දසුනක් විය. එමෙන්ම ඇය තරගාවලින් පනහක් පමණද නරඹා තිබින. එනමුදු දැන් ඇය ඉදිරියේ රඟදැක්වෙමින් තිබෙන්නේ වෙනස්ම ආකාරයේ රංගනයකි. මාරාන්තික රංගනයකි. වැරැදියට තබන එක පියවරකින් පවා නැට්ටුවාගේ මරණය තීරණය වනු ඇත. සටන නරඹමින් සිටින අතරේ වෙනත් සමයක සිදුකෙරුනු වෙනත් ද්වන්ද්ව සටනක මතකයන් හරියට අද ඊයේ සිදු වූවාක් මෙන් කැට්ලින් ස්ටාර්ක් ගේ මනස ඉදිරියේ දිගහැරෙන්නට විය.

ඔවුන් දෙදෙන එකිනෙක මුනගැසීමට තීරණය කර තිබුනේ රිවර්රන්හි පහළ සෙන්ඩුවාලුවේදී විය. පෙටයර් බේලිෂ් ශිරෂ්කය, පපු ආවරණය සහ මුදු සන්නාහය පමණක් ඇඳ සිටින අයුරු දුටු බ්‍රැන්ඩන් ඔහු ගේ සන්නාහයේ බොහෝ කොටස්ද ගලවා දැමුවේය. පෙටයර් සටන වෙනුවෙන් පැළැඳීම පිණිස ඇගේ ආශිර්වාදය සහිත යමක් ඉල්ලා සිටියද ඇය එය ප්‍රතික්ෂේප කලාය. ඒ වනවිටද ඇගේ පියා විසින් ඇයව බ්‍රැන්ඩන් ස්ටාර්ක්ට පොරොන්දු වී තිබින. එබැවින්, ඇගේ ආශීර්වාදය - ඇගේ අතින්ම ගෙත්තම් කල ඉපිලෙන ට්‍රවුට් මසුන් සහිත ලා නිල් පැහැ ලේන්සුව - ඇය බ්‍රැන්ඩන්ට ලබා දුන්නා ය. "අනේ! එයා මෝඩ පුංචි කොල්ලෙක්. ඒත් එයා මගේ සහෝදරයෙක් වගේ. එයා මැරුනොත් මට ගොඩක් දුක හිතෙයි." ලේන්සුව දෙන අතරේ ඇය බ්‍රැන්ඩන්ට ආයාචනා කලාය. සීතල ස්ටාර්ක් දෙනෙතින් ඇය දෙස බැලූ ඇගේ අනාගත වල්ලභයා ඇයට ආදරය කල මේ කොලුවාගේ පණ බේරන බවට පොරොන්දු විය. 

එම සටන පටන් ගන්නවාත් සමගම වාගේ අවසන් විය. වැඩුනු මිනිසකු වූ බ්‍රැන්ඩන් සුළැඟිල්ලාට පහර පිට පහර එල්ල කරමින් සෙන්ඩුවාලුවේ එක් කොණක සිට අනෙක් කොණ දක්වා හඹා ගියේ දියට බසින පියගැටපෙළ දිගේ පහළටද සිය ප්‍රහාරය මෙහෙයවීය. "යටත්වෙයන්!" යැයි කිහිපවරක්ම අණ ලැබුනද තුවාල දුසිමකින් පමණ ලේ පෙරමින් සිටි පෙටයර් හිස සලමින් දිගින් දිගටම සටන් වැදුනේ ය. අන්තිමේදී ඔවුන් දෙදෙනා වලළුකර තෙක් වූ දියේ බැස සටන්කරමින් සිටියදී පෙටයර් ගේ සන්නාහය සහ කබාය කපාගෙන ළපැත්තට කිඳා බසින්නට එල්ල කල දරුණු පැති පහරක් මගින් බ්‍රැන්ඩන් විසින් මෙම සටන නිමා කරන ලදී. එය කෙතරම් ගැඹුරු කැපුමක් වී ද යත් එය මාරාන්තික තුවාලයක් බව කැට්ලින්ට එක් සැනින් වැටහී ගියේය. ළපැත්තට තද කරගත් ඇඟිලි අතරින් රුධිරය වෑහෙද්දී බිම ඇද වැටෙමින් සිටි කොලුවා ඈ දෙස බලා 'කැට්' යනුවෙන් මිමිනීය. එය ඇයට අමතක වී යැයි ඇය විශ්වාස කලාය.

ඒ ඈ විසින් ඔහු ගේ මුහුණ දුටු අවසාන අවස්ථාව විය... එදා කින්ග්ස් ලෑන්ඩින්ග්හි දී ඔහු ඉදිරියට ඇයව කැඳවාගෙන යන තුරු ඔහුව දුටු අවසාන අවස්ථාව විය.

රිවර්රන් හැරදා යන්නට තරමේ සුවයක් ලබන්නට සුළැඟිල්ලාට දෙසතියක් පමණ ගතවිය. එනමුදු ඒ කාලය තුළ ඔහු රඳවා සිටි කුළුණ වෙත යාම පියා විසින් ඇයට තහනම් කර තිබුනි. එවකට ලජ්ජාශීලී, මෘදු හදවතකින් යුතු දැරියක වූ ලයිසා ඔහුට සාත්තුකරන්නට මේස්ටර්වරයාට සහාය වූවාය. එඩ්මුයර් ද ඔහුව බලන්නට ගොස් තිබුනද පෙටයර් ඔහුව හමුවීම ප්‍රතික්ෂේප කර තිබින. ද්වන්ද්ව සටනේදී බ්‍රැන්ඩන්ගේ සහචරයා ලෙස ක්‍රියාකර තිබූ එඩ්මුයර්ට සමාව දීමට සුළැඟිල්ලාට අසීරු විය. ගමන් කිරීමට හැකි තරමට යාන්තම් සුව වූ වහාම පෙටයර්ව ආවරණය කල දෝලාවක බහා ලූ හස්ටර් ටලී උතුමානන් ඔහු ගේ උපන්බිම වූ අතැඟිලි වෙත ඔහුව නැවත පිටත්කර හැරියේය.

වානේ මත වානේ ගැටී නැගුනු රැවුදෙන හඬ කැට්ලින්ව නැවත වර්තමානයට කැඳවන්නට සමත් වීය. සෙර් වාර්ඩිස් මේ වනවිට බ්‍රොන්ට ඉතා තදින් පහරදෙමින් සිටියේ ය. කුලී හේවායා ඉතා සූර ලෙස ගස් මුල් මතින් පනිමින්, සියලු පහර වලකමින් පසුබැස්සේ සිය සතුරා කෙරෙන් කිසිවිටෙකත් දෑස් ඉවතට නොගත්තේ ය. ඔහු කඩිසර, බුහුටි සටන්කරුවකු බව කැට්ලින්ට වැටහින. නයිට්වරයා ගේ රිදීවන් අසිපත කිසිවිට ඔහු අසලකටවත් නොපැමිණුනු නමුදු ඔහු ගේ කැත, අළුවන් අසිපතින් වැදුනු පහරක් නිසා සෙර් වාර්ඩිස් ගේ උරහිස් ආවරණයෙන් කොටසක් කැපී ගොස් තිබින.

මේ කෙටි බිහිසුණු ප්‍රහාරය පටන්ගත් සැනින්ම පාහේ අවසාන වූයේ බ්‍රොන් පැත්තකට පැන වැලපෙන කාන්තාව ගේ ප්‍රථිමාව පිටුපසින් අතුරුදන් වූ බැවිනි. සෙර් වාර්ඩිස් ඉදිරියට පැන එල්ලකල පහරින් සිදුවූයේ ඇලයිසා ගේ කිරිගරුඬින් කල කලවෙන් ගිනිපුපුරු මතුවීම පමණි.

"අපෝ! මෙයාලා හරියට සටන්කරන්නෙ නැනේ අම්මා." ඉයරිහි උතුමානන් මැසිවිලි නැගුවේය. "හරියට සටන් කරන්ට කියන්ටකො."

"එයාල එහෙම කරයි මගේ රත්තරන් පැටියෝ." ඔහු ගේ මව සැනසිලි බස් පැවසුවා ය. "ඔය කුලී හේවායට දවස පුරාම දුව දුවා ඉන්ට බෑ."

උද්‍යානයේ රැස්ව සිටි සමහර වංශාධිපතිවරුන් විකාර විහිළු තහළුවෙන් වයින් බඳුන් හිස් කල ද ටිරියන් ලැනිස්ටර් ගේ අසමාන දෑස් කිසිවිටෙකත් සටන්කරුවන් වෙතින් නොගිලිහුනේ ය. හරියටම මේ මුලු ලෝකයේම සිටියේ ඔවුන් දෙදෙනා පමණක් මෙනි.

ප්‍රථිමාව පිටුපස සිට වේගයෙන් පැන ආ බ්‍රොන් වම්පසට බරවෙමින් දෑතින්ම වේගවත් පහරක් නයිට්වරයා ගේ අනාරක්ෂිත දකුණු පැත්තට එල්ලකලේ ය. සෙර් වාර්ඩිස් පහර වැලැක්වූ නමුදු එය සම්පූර්ණ වැලැක්වීමක් නොවීය. කුලී හේවායා ගේ අසිපත් තලය ඉහළට ඇදී ගොස් රැවුදෙමින් නයිට්වරයා ගේ ශිරස්කයේ ගැටුනේ එක් උකුසු තටුවක් කපා හෙලීය. අඩි බාගයක් පසුපසට තැබූ සෙර් වාර්ඩිස් සිය පලිහ එසවූ අතර බ්‍රොන් ගේ අසිපත ඒ මත වැදීමෙන් ලී පතුරු දසත විහිදී ගියේය. නැවත වරක් පලිහෙන් මෑත්ව වම් පැත්තට අඩියක් තැබූ කුලී හේවායා සෙර් වාර්ඩිස් ගේ උදරයට පහර දුන්නේ ය. දැලිපිහි මුවහතින් යුත් අසිපත ඵලක සන්නාහයේ දීප්තිමත් රිදී ඉරක් ඇන්දේය.

සෙර් වාර්ඩිස් පසු පය පෙරට තබා මාරාන්තික පහරක් සමගින් රිදීවන් අසිපත පහළට ගෙන ආවේය. පහර වැලකූ බ්‍රොන් වහා පැත්තට පැන්නේය. නයිට්වරයා මහහඬක් නංවමින් ප්‍රථිමාව හා ගැටුනෙන් එය තම පාදස්ථය මත සෙලවෙන්නට විය. අන්දමන්ද වූ ඔහු වහා අඩියක් පස්සට ගෙන එහා මෙහා බලමින් සිය ප්‍රතිවාදියා කොහිදැයි සොයන්නට විය. ශිරස්කයේ පටු දෑස් විවර විසින් ඔහු ගේ දර්ශනය සීමා කර තිබින.

"ඔන්න පිටිපස්සෙන් සෙර්!" හන්ටර් උතුමානන් හඬ නැගුවද ඒ ප්‍රමාද වැඩි විය. බ්‍රොන් දෑතින්ම දුන් අසිපත් පහර සෙර් වාර්ඩිස් ගේ දකුණු අතේ වැලමිටෙහි වැදුනි. සන්ධිය ආවරණය කරමින් තිබුනු තුනී ලෝහ තහඩු පොඩි වී ගියේය. නයිට්වරයා ගොරවමින් ආපසු හැරුනේ සිය අසිපත ඉහළට එසවීය. මෙවර බ්‍රොන් පසුබැස්සේ නැත. අසිපත් යුගළ එකිනෙක සොයා පියඹද්දී ඔවුන්ගෙන් නැගුනු වානේමය සංගීතය උද්‍යානය පුරාමත් ඉයරීහි ධවල කුළුණු පුරාවටමත් නින්නාද විය.

"සෙර් වාර්ඩිස් ට තුවාලයි." සෙර් රඩ්‍රික් පැවසීය.

කැට්ලින්ට එය අමුතුවෙන් කීමට අවශ්‍ය නොවීය. නයිට්වරයා ගේ බාහුව ඔස්සේ ගලාහැලෙන දීප්තිමත් රතු පැහැ රුධිර ධාරාවත් තෙත් වූ වැලමිට සන්ධියත් ඇය පැහැදිලිවම දුටුවා ය. මේ වනවිට ඔහු එල්ල කරමින් සිටි සෑම වැලකුම් පහරක්ම කලින් එකට වඩා සෙමින් පැමිණියේ ය. සෙර් වාර්ඩිස් සිය සතුරා දෙසට පලිහ හරවමින් හැරුනු නමුදු බ්‍රොන් බළලෙකු මෙන් එතැනින් ලිස්සා නැවත වම් පැත්තට පැන්නේ ය. ගතවන මොහොතක් මොහොතක් පාසා කුලී හේවායා තවතවත් සවිමත් වන බව පෙනුනි. ඔහුගේ කැපුම් පැහැදිලිවම පෙනෙන සලකුණු ඉතුරු කරන්නට සමත් වී තිබින. සෙර් වාර්ඩිස් ගේ සන්නාහය, ඔහු ගේ දකුණු කළවය, ඔහු ගේ උල් හොට සහිත ශිරස්කය, පපු ආවරණය සහ ග්‍රීවාවරණය පුරාම ගැඹුරු කැපුම් පහරවල දිලිසුනි. අඩසඳ සහ උකුස්සා කැටයම් කල සන්ධි ආවරණ වලින් එකක් දෙකට කැපී පටියෙන් එල්ලී තිබින. ඔහු අසීරුවෙන් හුස්මගන්නා හඬ ශිරස්කයේ වා සිදුරු තුළින් පැහැදිලිවම ඇසෙන්නට විය.

උඩඟුකමින් අන්ධ වී සිටියද මිටියාවතේ සියළුම රදලයින්ට හා නයිට්වරුන්ට සිදුවන්නට යන දෙය පැහැදිලිවම තේරුම් ගත හැකිවිය. එය දැකගත නොහැකි එකම පුද්ගලයා වූයේ ඇගේ ‍මෝඩ සොයුරිය පමණි. "දැන් ඇති සෙර් වාර්ඩිස්! ඔන්න ඕක ඉවර කරලා දාන්ට. මගේ චූටි පැටියට මහන්සියි වගේ දැන්." ඇය සටන්කරුවන් වෙත අණ කලාය.

සෙර් වාර්ඩිස් ඊගන් අවසානය දක්වාම සිය ආර්යාවගේ අණ අකුරටම පිළිපැදි බව නම් කිසිවෙකුටත් පිළිනොගත නොහැකි කරුනක් විය. එක් මොහොතක පලිහට මුවා වී පසුබසිමින් සිටි ඔහු ඊළඟ මොහොතේ පෙරට පැන පහරදෙන්නට පටන් ගත්තේය. කුළු හරකෙක් මෙන් සිදුකල එම හදිසි කඩා පැනීම බ්‍රොන්ව අසමතුලිත කරවන්නට සමත් විය. කුලී හේවායා මතට කඩා වැදුනු සෙර් වාර්ඩිස් පලිහේ දාරයෙන් ඔහුගේ මුහුණට පහරක් දුන්නේ ය. බ්‍රොන් ලිස්සා වැටෙන්නටම ගිය නමුදු අන්තිම මොහොතේ පසුපසට අඩියක් තබා, ගලක පය පැකිලෙමින් වුවද ප්‍රථිමාවේ එල්ලී කෙලින් සිටීමට ඔහුට හැකි විය.

සිය පලිහ ඉවතට විසිකර දැමු සෙර් වාර්ඩිස් බ්‍රොන් වෙත පිනූයේ මාරාන්තික පහරක් එල්ල කිරීම පිණිස අසිපත දෑතින්ම අල්ලා එසවීය. ඔහු ගේ දකුණත වැලමිටේ සිට ඇඟිලිතුඩු දක්වාම ලෙයින් පෙඟී ගොස් තිබින. ඔහු එල්ලකල පහර බ්‍රොන් ගේ ගෙලේ සිට නාභිය දක්වා දෙපලු කර දමන්නට සමත් වූ දරුණු පහරක් වූ නමුදු... ඒ පහර පිළිගන්නට බ්‍රොන් එතැන නොසිටියේ ය.

බ්‍රොන් වහා පසුපසට පැන්නේ ය. ජොන් ඒරින් ගේ කැටයම් කල, පියකරු රිදී අසිපත කිරිගරුඬ ප්‍රථිමාවේ වැලමිටක වැදී දෙකට කැඩී ගියේය. බ්‍රොන් ප්‍රථිමාවේ පිටට සිය උරහිසේ බරදෙමින් තල්ලු කල අතර ඇලයිසා ඒරින් සෙර් වාර්ඩිස් ඊගන්වද යට කරමින් මහහඬක් නගා පෙරලි ගියේය.

බ්‍රොන් ක්ෂණයකින් සෙර් වාර්ඩිස් මතට පිනීය. කැපී ගිය සන්ධි ආවරණයට පයින් ගසා ඉවත්කල ඔහු නයිට්වරයා ගේ බාහුව සහ පපු ආවරණය අතර දුර්වල ස්ථානයක් අනාවරණය කරගත්තේ ය. සෙර් වාර්ඩිස් පැත්ත වැටී, වැලපෙන කාන්තාව ගේ උඩුකයටත් පොළොවටත් අතර සිර වී සිටියේ ය. දෑතින්ම අසිපත ඔසවාගත් කුලී හේවායා සිය ගතේ මුළු බර සමගින් එය සෙර් වාර්ඩිස් ගේ ඉළඇට අතරින් ඇතුළුකරද්දී නයිට්වරයා ගේ උගුරෙන් නැගුනු වේදනාත්මක කෙඳිරිල්ල කැට්ලින්ට පැහැදිලිව ඇසුනි. සෙර් වාර්ඩිස් ඊගන් මඳක් ගැස්සී ඊළඟ මොහොතේ නිසල වූයේය.

ඉයරි බලකොටුව පුරා නිහඬතාවක් පැතිර යන්නට විය. සිය ශිරස්කය ඇද ගලවාගත් බ්‍රොන් එය කණබිස්ස මත අත හැරියේ ය. පලිහ වැදුනු තැන ඔහු ගේ තොල පැලී බියකරු ලෙස ලේ ගලමින් තිබින. ඒ අඟුරුවන් කළු කේශ කලාපය දහදියෙන් තෙත්ව තිබින. ඔහු බිමට කෙල පහරක් ගැසූ අතර ඒ සමගින් කැඩුනු දතක් ද ඉවතට විසි විය.

"දැන් සටන ඉවරද අම්මා?" ඉයරිහි උතුමානන් විමසුවේ ය.

'නෑ!' ඔහුට පවසන්නට කැට්ලින්ට දැඩිව උවමනා විය. 'දැන් තමයි සටන හරියටම පටන්ගන්නේ.'

"ඔවු." ලයිසා දුක්බර හඬින් කීවාය. ඇගේ ස්වරය මියගිය ගෘහාරක්ෂක බලකා ප්‍රධානියා මෙන්ම සීතල, අප්‍රාණික එකක් විය.

"දැන් මට පුංචි මිනිහව පියාඹලා යවන්ට පුළුවන් ද?"

උද්‍යානයේ අනිත් පස අසුන්ගෙන සිටි ටිරියන් ලැනිස්ටර් නැගී සිටියේ ය. "මේ පුංචි මිනිහාව නම් නෙවෙයි. මේ පුංචි මිනිහා පහළට බහින්නේ ටර්නිප් ගෙනියන කූඩෙක නැගලා. බොහොමත්ම ස්තූතියි!"

"උඹ හිතාගන ඉන්නේ-" ලයිසා පටන්ගත්තා ය.

"මම හිතාගෙන ඉන්නේ, ඒරින් වංශයට තමන් කියාපු දේවල් මතක ඇති කියලයි." පුංචි යකා කීවේය. "ගෞරවය තරම් ඉහළින්!"

"අම්මා ඔයා කිවුවෙ මට එයාව පියාඹලා යවන්ට දෙනවා කියලා.” ඉයරිහි උතුමානන් තම මවට කෑගැසී ය. “ඔයා පොරොන්දු උනා." ඔහු වෙවුලන්නට පටන්ගත්තේ ය.

වියරුව නිසා ලයිසා ගේ මුහුණ රතු වී ගියේය. "දෙයියො තීරණය කරලා තියනවා මේ මිනිහා නිර්දෝෂියි කියලා දරුවො. එයාට නිදහස දෙනවා ඇරෙන්ට අපට වෙන කරන්ට දෙයක් නෑ." ඇය ස්වරය උස් කලාය. "සෙබළුනි, මෙන්න මේ ලැනිස්ටර් උතුමානන්වයි, එයාගෙ මේ... මුර්ගයයි මගේ දෑහැට නොපෙනී මෙතනින් අරන් පලයල්ලා. උන්ව ලේ වාහල්කඩ ළඟට එක්කරන් ගිහින් මුදා හැරපල්ලා. උන්ට ගංගා ත්‍රිශූලයට ලංවෙන්ට ඇති තරම් කෑමබීමයි, අශ්වයොයි දෙන්ට වග බලාගනිල්ලා. උන්ගෙ ආයුධයි අනිත් ආම්පන්නයි හැම එකක්මත් ආපහු දීපල්ලා. කඳුකර පාරේ ආපහු යනකොට උන්ට ඒවා ඕනේ වෙයි."

"කඳුකර පාර!" ටිරියන් ලැනිස්ටර් ඇසුවේ ය. ලයිසා ගේ මුවේ සිහින් තෘප්තිමත් සිනාවක් ඇදී ගියේය. එය වෙනස්ම විදිහක මරණ දඬුවමක් බව කැට්ලින් වටහාගත්තා ය. ටිරියන් ලැනිස්ටර් ද අනිවාර්යයෙන්ම එය වටහාගත්තා විය යුතුය. එනමුදු කුරුමිට්ටා සමච්චල් සහගත අයුරින් හිස නමා ඒරින් ආර්යාවට ආචාර කලේය. "ඔබතුමිගෙ කැමැත්තක් මගේ ආර්යාවනි. මම හිතන්නේ අපි දන්නවා ආපහු යන පාර."


Brynden Tully: “Black fish or no, I am still a Tully!”

28 comments:

  1. එලකිරි පයිට් සීන් එක. ඇඟ කිලි පොල පොලා යනවලු. :)

    ඒ වුනත් මෙතන නම් වැරදිලු.

    //මම හිතාගෙන ඉන්නේ, ඒරින් වංශයට තමන් කියාපු දේවල් මතක ඇති කියලයි." පුංචි යකා කීවේය. "ගෞරවය තරම් ඉහළින්!"//

    ReplyDelete
    Replies
    1. ඒ ඇයි මගේ කුමරුනි?

      Delete
    2. "As high as honour" කෙලින්ම පරිවර්තනය නම් ඔය හරි නේද පොං ප්‍රින්ස්?

      ඒත් ඇත්තටම ඒකෙන් කියවෙන්නෙ මොකක්ද? ඔවුන්ගේ ගෞරවය ඉහල කියන එකද? ගෞරවය ඉහල තියන තාක් ඔවුන් උසස් ද? ගෞරවය නම් ඔවුන් (Arryn personifies Honour)?
      මෙතන honour කියන එකට ගෞරවය කියන වචනයට වෙනස් හෝ ඊට වඩා තේරුමක් අවශ්යද කියන්නත් බෑ

      කෙසේ හෝ මාගේ මේ වියායාමය බුර් හා ටයනාන්ටි උත්තමයන්ගේ ගෞරවනීය පරිවර්තනය ප්‍රශ්න කිරීමට නොව හුදෙක් පොං කුමරුගේ කොමෙන්ට් එකට හොට දැමීම පමණක් බව සලකා මා නොව පොං උතුමා උල තබන මෙන් යටහත්ව ආයාචනා කරමි

      Delete
    3. ගෙනෙන් ඔය උල :P

      high as honour වෙනස් විදිහකට පරිවර්තනය අපහසු බව මගේ හැගීමයි. මම කිවූවේ ඒක ගැන නෙවෙයි.
      මෙතන ටිරියන් කියන්නේ "උඹලගේ වංශ පාඨය (sinhalen kiwwoth "words" ) මතකද? " කියල නෙවෙයිලුද?
      //ඒරින් වංශයට තමන් කියාපු දේවල් මතක ඇති කියලයි// කියපුවහම නිකන් හිතෙන්නේ කලින් දුන්න පොරොන්දුවක් මතක් කරනවා වගේනේ.

      hes just taunting the Arryns, reminding that even their "words" mention honor and they are considering something dishonorable.

      Delete
    4. පොම් කුමරුන් හා එකඟ වෙමි.. එතැන පරිවර්තනයේ දී වාක්‍යයේ තිබුනු අදහස පොඩි වෙනසකට බඳුන් වී තිබේ.. :-O

      හැබැයි ඔය තියෙන විදියටත් ගන්ට පුළුවන් නේද පොම් කුමරුනි? ලයිසා එකඟවුනා සටන් නඩු විභෘගයකට යන්ට.. ඉතින් එහෙමනම් සටනින් ජයගත්ත කෙනා නඩුව දිනන්ට ඕන.. එතැනින් එහාට නෝ කතා - නෝ සිනා.. එයාට ඒ දුන්න පොරොන්දුව අමතක කරන්ට බෑ..

      Delete
    5. උකුස්සොයි, මාළුවොයි ඔක්කොම ගෞරවේටලු වැඩ...

      Delete
    6. නාග රජ සලකුණ එහෙ නැද්ද King Choolow?

      Delete
    7. ලැයිසා ඇන්ටි කොහෙද බන් ඇරින් ?
      මොකා උනත් ටලී කිව්වා නේද දැන් එකෙක්?

      Delete
    8. House Saltcliffe of Saltcliffe

      nine-headed serpent, black on silver

      Delete
    9. This comment has been removed by the author.

      Delete
    10. @ප්‍රා ජී..

      වෙස්ටරෝස් එක්ක හෙළයන් ගේ ගනුදෙනුවක් තිබ්බේ නෑ නේ ලඟක් වෙනකං.. ඒක හින්දා හරිම නාග සලකුණු එහේ තියෙන්ට විදියක් නෑ..
      ඔලු ප්‍රශ්නෙට උත්තර දෙන්ට ඉස්සෙල්ලා කියන්ට බලන්ට ඔබතුමාගේ නැට්ටට මොකෝ උනේ කියලා..(සිංහයෝ විතරක් නෙවේනේ නැට්ට නැතුව ඉන්නේ මෙතන)

      @පිං පොම්
      කව්ද දැන් ඒ ඇන්ටි ඇරින් කිව්වේ.. අර රූකඩ උන්නාන්සෙයි ටයනාන්ටියි කියන විදියට එයා මාළු පැටියා කාලේ පව්ලයි, ගව්රවෙයි, රාජකාරියයි ද මොකක්ද එකක් තමා කිව්වාය කියන්නේ.. උකුස්සා උස්සන් ගියාම ගෞරවය තරම් ඉහළින් ද මොකක්ද තමයි දැන් කියනවය කියන්නේ.. අනික අර කළු එකා කියලා තියෙන්නෙත් බොරු නෙවේනේ..

      Delete
    11. @King Choo
      1. මෙතන ගොරිල්ලෙක් නැත. ( ඔබ එසේ සිටී යයි සිතා ඇසුවේයයි සිතමි )

      2 ගොරිල්ලන්ට වලිගය නැත්තේ පරිණාමය නිසා මිස ආන්ටිගත හේතුවක් (හෝ මෙතනට විශේෂ වෙනත් හේතුවක් ) නිසා නොවේ

      Delete
    12. // ගොරිල්ලන්ට වලිගය නැත්තේ පරිණාමය නිසා මිස..... //

      That's what you tell to the TV/ Radio/ press conference right? Anyhow, the whole world know the true reason... :-P

      Delete
    13. ගහලය, රාජකීය කුමරියන්හට නින්දා දෙන අන්දමේ ආමන්ත්‍රන කරනා සියලුම සතුන්ගේ හිස් ගසා දැමීමට මින් නියම කරමි.

      ද්වන්දව සටන්, වස විස දීම්, හොරෙන් බැටදීම් කිසිවක් නැත. කෙලින්ම හිස් පමණක් වෙන් කෙරේ. :P

      මේ වගට මාලිගාවේ මහ රැජිනී...:D:D

      Delete
    14. වලිගය ඇතත් නැතත් ගොරිල්ලා ගොරිල්ලාමය....:P



      Delete
    15. වඳුරු හැවිල්ල

      මගෙ වලිගය කපපු එකා //
      දදය ඔබගෙ පාළු ය කා.. ආ.. ආ
      තව එක බුද දිනක් තකා
      ඉන්නට ඉඩ නොදී මකා

      කතරගමට රුහුණු රටේ
      හිඟා කකා ලබන විටේ...//
      පයින් මැ ගොස් ඇවිදැ වටේ
      පොළොවෙ උලා නළල් ඇටේ

      බැදපු ව‍ටුවෝ වැලක් පුදමි
      අරිස්ට වඩි දෙකක් පුදමි
      පලතුරු වට්ටියක් පුදමි
      ගෙඩි සුපියල් සීයක් දෙමි

      දුදනොද බිඳ
      බඳ තෙද කඳ
      කඳ දෙව් රද
      සාමිනේ ...//

      Delete
    16. දැන් ඔය හැවිල්ල කියන්නෙ කඳ දෙවියන්ට ද නැත්තං හනුමාන් දෙවියන්ට ද? :-O

      Delete
    17. @Bur, Sasquatch, Bigfoot, Yeti, Alma, Ebu gogo etc.

      Delete
    18. @Motts, හැවිල්ල කුරුලු පාට් එකෙන් නැද්ද? බසුලුව ?

      Delete
    19. කුරුළු හැවිල්ල

      පාට එරන් ගඟබඩ යන කොකුන්නේ
      රෑට බතට උන් කොතැන ද ලගින්නේ
      ලැබුනෝතින්, ලඟ ලඟමයි නමන්නේ
      හොර බස්සා දවල්ටමයි නිදන්නේ

      කැන්ද කොලේ හැලප තමයි ඔතන්නේ
      කන්න මුකුත් නැහ්ද කියල අහන්නේ
      ටික දිනකින් දැක්කෙත් නෑ බොලන්නේ
      බයිට් එකට , බුදපු ඔ‍ටුවෝ දියන්නේ

      Delete
  2. බුහැක්
    ලැයිස තරං මොඩ වාහෙ කෙනෙක් ගෙන් ජොන් ගැලවිල මැරිල ගිය එකට උන්දැගෙ ආත්මය සන්තෝස වෙනව ඇති
    හිකිස්

    ReplyDelete
    Replies
    1. හපොයි මේ කමෙන්ට්ස් ජොන් ඒරින් උතුමානන් දැක්කානං එහෙම බුවා තව පාරක් වහ බොනවා.. :-D

      Delete
    2. පොර සියදිවිනසාගත්තද.. වහ දුන්නේ බේලිෂ් ඇගිල්ලා වෙන්ට බැයිද?

      Delete
  3. හොඳ වැඩේ මෝඩ ගැණුන්ට...:D

    ReplyDelete
  4. එක පිට කතා දෙකක් කියවන එකත් හෙන ආතල් වැඩක්... :D

    ReplyDelete