Friday 21 November 2014

එඩාර්ඩ් 09


සුළැඟිල්ලා ඔහු එනතෙක් වෛශ්‍යා ගෘහයේ ප්‍රධාන ශාලාවේ පොරොත්තු වෙමින් පිහාටු ගවුමක් හැඳි, උසැති, රූමත්, කළු පැහැ සමින් යුතු ගැහැණියක හා මිත්‍රශීලී අයුරින් දොඩමින් සිටියේ ය. හේවර්ඩ් ගිනිඋඳුන අසල තරබාරු, ප්‍රසන්න කෙල්ලක හා අහිමිවීමේ ක්‍රීඩාව කරමින් සිටියේ ය. පෙනුනු අන්දමට නම් ඔහුට ඉණපටිය, සළුව, සන්නාහ කමිසය හා දකුණු කකුලේ බූට්ස් සපත්තුව අහිමි වී තිබුනු අතර දැරිය ඉණ දක්වාම නිරුවත්ව සිටියා ය. කවුළුවක් අසල සිටගෙන මේ ක්‍රීඩාව දෙස බලාසිටි ජොරී ගේ මුවේ වියළි සිනහවක් පහළ වී තිබින.

පඩිපෙළ පාමුල නැවතුනු නෙඩ් ඉණපටියෙන් සිය අත්වැසුම් යුගළ ඇදගත්තේ ය. "අපට යන්ට වෙලාව හරි. මගේ රාජකාරිය ඉවරයි‍."

සිය ඇඳුම් ආයිත්තම් සුරතට ගත් හේවර්ඩ් සැනින් නැගිට සිටියේ ය. "ඔබේ කැමැත්තක් මගේ උතුමානනි." ජොරී කීය‍. "මම විල්ට උදවු කරන්නම් අශ්වයො ටික අරන් එන්ට." ඔහු දොර දෙසට පිය මැන්නේ ය.

සුළැඟිල්ලා සිය සමුගැනීම් වෙනුවෙන් සෑහෙන වේලාවක් වැය කලේය. ඔහු කළු පැහැති ගැහැණිය ගේ අත සිඹ ඇගේ කණට කර යම් විහිළුවක් කල අතර ඇය කොක්හඬලා සිනාසුනා ය. "ඔබේ රාජකාරිය." නෙඩ් දෙසට අලස ‍ලෙස ඇවිද එන අතරේ ඔහු කීය. "එහෙමත් නැත්තම් රොබර්ට්ගෙ රාජකාරියද? මිනිස්සු නම් කියන්නෙ හස්තය රජතුමාගෙ හීන දකිනවා කියලා, රජතුමාගෙ කටහඬින් කතා කරනවා කියලා, රජතුමාගෙ අසිපතින් රාජ්‍ය පාලනය කරනවා කියලා. ඒ කියන්නෙ ඔබ ගෑනියෙක් එක්ක ඇඳට නැග්ගහමත් රජතුමාගෙ-"

"බේලීෂ් උතුමානනි." නෙඩ් බාධා කලේය. "ඔබ බොහොම දුරදිග යනවා වැඩියි. ඔබේ උදවුවට මම කෘතඥ නොවී ඉන්නෙ නැහැ. ඔබ නැත්තං මේ ගනිකා මඩම හොයාගන්ට අපට තව අවුරුදු ගානක් යන්ට තිබුනා. ඒ වුනත් ඒකෙන් අදහස් වෙන්නෙ නෑ මම මෙහෙම ඔබේ සමච්චලයට ලක්වෙන්ට සූදාණම් කියලා. අනිත් එක මම තවදුරටත් රජතුමාගෙ හස්තය නෙවෙයි."

"‍ඝෝරවෘකයා කියන්නෙ හරිම හිරිහැරදායක සතෙක් වෙන්ට ඕන." සුළැඟිල්ලා ඇද වී ගිය මුවින් යුතුව කීය.

ඔවුන් ඉස්තාල වෙත පියමනිද්දී උණුසුම් පොද වැස්සක් ඇද හැලෙන්නට වන. නෙඩ් සිය සළුව ඇද හිස වසා ගත්තේ ය. ජොරී ඔහු ‍ගේ අසු රැගෙන පිටතට ආ අතර එකතකින් සුළැඟිල්ලා ගේ අසු හා අනිත් අතින් සිය ඉණපටිය හා කලිසම අල්ලාගත් තරුණ විල් ඔහු පසුපසින් පිටතට ආවේය. නිරුවත් දෙපයින් යුතු ‍වෛශ්‍යාවක් ඉස්තාල දොරට හේත්තු වී ඔහු දෙස බලමින් කැකිරි පලන්නට වූවාය‍.

"අපි දැන් ආපහු බලකොටුවට යනවද මගේ උතුමානනි?" ජොරී ඇසීය. හිස සැලූ නෙඩ් සෑදලයට නැග්ගේ ය. ඔහුට පසෙකින් සුළැඟිල්ලා ද තම අසු පිට නැගුනු අතර අනෙකුන් ඔවුන් පසුපසින් වැටුනහ.

"ෂතායා හරිම කදිම තැනක් තමා කරගෙන යන්නෙ." සුළැඟිල්ලා කතාව ඇරඹීය. "මට සමහර වෙලාවට හි‍තෙනවා ඒක සල්ලි දීලා ගන්ටත්. ගනිකා මඩම් කියන්නෙ නැවුවලට වඩා බොහොම හොඳ ආයෝජනයක්. ගනිකාවො ලේසියෙන් මුහුදු පතුලට කිඳා බහින්නෙ නෑ. ඒ ව‍ගේම ඒවාට මුහුදු කොල්ලකාරයො ගොඩවුනාම උනුත් අනිත් අය වගේම හොඳට සල්ලි ගෙවනවා." සිය විහිළුවට ඔහුම සිනාසුනේ ය.

ඔහුට දොඩවන්නට ඉඩ දී නෙඩ් නිහඬවිය. මොහොතකට පසු සුළැඟිල්ලා සිය දෙඩවීම නැවැත්වූයෙන් ඔවුහු නිහඬවම අසුන් ඉදිරියට ‍මෙහෙයවූහ. කින්ග්ස් ලෑන්ඩින්ග්හි වීදි අඳුරු හා පාළු මුහුණුවරක් ගති. වර්ෂාව විසින් සෑම කෙනකුවම වහළයක් යටට යවා තිබින. වැහිබිඳු නොකඩවාම නෙඩ් ගේ හිසට තදින් පහර දුන් අතර ඒවා රුධිරය මෙන් උණුසුම් විය, පැරැණි වරදකාරී සිතුවිලි මෙන් නපුරු විය.

"රොබර්ට් කවදාවත් එක ගෑනියෙකුගෙන් සෑහීමකට පත්වෙන්නෙ නෑ." ලියානා වරක් වින්ටර්ෆෙල්හිදී ඔහුට කියා තිබින. ඒ මීට වසර බොහෝ ගණනකට පෙරාතුව ඔවුන් ගේ පියා විසින් ස්ටෝර්ම්ස් එන්ඩ්හි තරුණ උතුමානන්ට ඇගේ විවාහය ස්ථිර කල දා රැයේ විය. "මම අහලා තියෙනවා එයාට මිටියාවතේ කාගෙදෝ කෙල්ලෙක් ගෙන් හම්බවෙච්ච දුවෙක් ඉන්නවා කියලා." නෙඩ් විසින් මේ බිළිඳා සිය සුරතින්ම වඩාගෙන තිබුනු අතර ඇයගේ කතාව ප්‍රතික්ෂේප කිරීමේ හැකියාවක් ඔහුට නොවීය. එමෙන්ම සිය සොයුරියට බොරු කීමේ හැකියාවක් ද ඔහුට නොවීය. එනමුදු ඔහු ඇයව අස්වසමින් කියා සිටියේ ඔවුන් ගේ විවාහ ගිවිසුමට පෙර ‍‍රොබර්ට් විසින් කල දේ එතරම් වැදගත් නොවන අතර ඔහු හොඳ මිනිසකු හා ඇයට මුලු හදින්ම ආදරය කරන බවත් ය. ලියානා මීට සිනාසුනා පමණි. "ආදරේ සුන්දරයි තමා මගේ ආදරණීය නෙඩ්. ඒ වුනත් ඒකට බෑ මිනිහෙකුගෙ ගති පැවතුම් වෙනස් කරන්ට."

දැරිය කෙතරම් ලාබාල වූවාද යත් නෙඩ් ඇගේ වයස විමසීමට පවා නොසිතුවේ ය. ඇය කන්‍යාවක් වූවාට සැක නැත. ‍හොඳින් මුදල් විසිකල හැකි නම් ඉහළ මට්ටමේ වෛශ්‍යා ගෘහයකට කන්‍යාවක් සොයාගැනීම අසීරු කරුනක් නොවේ. ඇයට ලා රත් පැහැ හිසකෙස් තිබුනු අතර නාසය දිගට ලප වැටී තිබින. "එයාට මම නම දැම්මෙ බරා කියලා." දැරිය බිළිඳියට කිරිදෙමින් පැවසුවා ය. "එයාගෙ පෙනුම එතුමන් වගේමයි. එහෙම නේද මයෙ උතුමානනි? එයාට තියෙන්නෙ එතුමන්ගෙම නහය, එතුමන්ගෙම හිසකෙස්..."

"ඇත්තෙන්ම‍." එඩාර්ඩ් ස්ටාර්ක් බිළිඳිය ගේ සිනිඳු, අඳුරු පැහැ හිසකෙස් අතගෑවේ ය. ඒවා ඔහු ‍ගේ අතැඟිලි අතරින් ලිස්සා ගියේ කළු පැහැ සේද මෙනි. ‍රොබර්ට් ගේ පළමු අවජාතක දැරියට ද තිබුනේ මෙවැනි කළු පැහැ සිනිඳු හිසකෙස් බව ඔහුට සිහිපත් විය.

"එතුමන්ව මුනගැහුනම ඒ ගැන කියනවද මයෙ උතුමානනි. ඒක... ඒකට ඔබතුමාගෙ අසතුටක් නැත්තම්. එතුමන්ට කියන්ට එයා ‍කොච්චර ලස්සනද කියලා."

"මම එයාට කියන්නම්." නෙඩ් ඇයට පොරොන්දු විය. නෙඩ් ගේ දුර්වලතාව එය විය. ‍නොමියන ආදරය ගැන අනන්ත පොරොන්දු දී දිනය හමාරවීමටත් පෙර ඒවා අමතක කර දැමීමට රොබර්ට්ට අපූරු හැකියාවක් තිබින‍. එනමුදු නෙඩ් ස්ටාර්ක් සැමවිටම සිය පොරොන්දු රැක්කේ ය. ලියානා මියයමින් සිටියදී තමා ඇයට වුනු පොරොන්දු ගැනත්, ඒ පොරොන්දු ඉටුකිරීම ‍වෙනුවෙන් තමාට ගෙවීමට සිදුවුන මිල හා කරන්නට සිදුවුනු කැපකිරීම් ගැනත් නෙඩ්ට සිහිපත් විය.

"ඒ එක්කම එතුමන්ට කියන්ට මම ඊටපස්සෙ වෙන කාත් එක්කවත් හිටියෙ නැහැයි කියලා. මම ඒ ගැන දිවුරනවා මයෙ උතුමානනි. අලුත් දෙවියන්ගෙයි පැරැණි දෙවියන්ගෙයි නාමෙන්. ෂතායා මට කිවුවා අවුරුදු බාගයක් නිවාඩු ගන්ට පුළුවන් කියලා දරුවා වෙනුවෙන්. ඒ එක්කම එතුමන් ආයෙමත් එයි කියලා හිතලා. ඉතින් ඒ නිසා ඔබතුමා එතුමන්ට කියන්ට මම එතුමන් වෙනුවෙන් බලන් ඉන්නවා කියලා. ඔබතුමා ඒක කරනවා නේද? මට රත්තරන් මුතුමැණික් වෙන මොකුත් ඕන නෑ. මට ඕන එතුමන්ව විතරයි. එතුමන් මට හැමවෙලාවෙම කරුනාවන්ත වුනා, ඇත්තෙන්ම‍.

"මම එයාට කියන්නම් දරුවො. මම පොරොන්දු වෙනවා‍. බරාට අඩුපාඩුවක් වෙන්ට දෙන්ට හොඳ නෑ."

එය ඇසූ දැරිය සිනාසුනා ය. එය කෙතරම් සුන්දර, සැලෙන සිනාවක් ද වී ද යත් ඔහු ගේ හදවත පසාරු වී ගියේය. වැහිබර රැයේ අසු ඉදිරියට මෙහෙයවද්දී නෙඩ් ඉදිරියේ ජොන් ස්නොව් ගේ මුහුණ මැවී ගියේය. එය ඔහු ගේ තරුණ කල පෙනුම හා සමාන පෙනුමක් ගත්තේ ය. දෙවියන් විසින් අවජාතකයින්ට මෙතරම් නරක අන්දමින් සලකන්නේ නම් ඔවුන් මිනිසුන්ව මෙතරම් කාමුක ආශාවන්ගෙන් පුරවාලන්නේ මන්දැයි නෙඩ් විපිලිසර සිතින් සිතුවේය. "‍බේලිෂ් උතුමානනි, ඔබ මොනවද දන්නෙ රොබර්ට්ගෙ අවජාතකයො ගැන?"

"හරි, මුලින්ම බැලුවොත් එයාට ඉන්නවා ඔබට වඩා අවජාතකයො."

"කී දෙනෙක්ද?"

සුළැඟිල්ලා දෙවුර ඇකිළීය. ඔහු ගේ කබායේ පිට දිගේ කුඩා දිය පහරවල් ගලා බැස්සේය‍. "ඒක එච්චරම වැදගත් දෙයක්ද? ඔබ ගෑනු ගොඩදෙනෙක් එක්ක ඇඳට නැග්ගොත් ඒ අතරින් සමහර උං ඔබට තෑගි දෙයි. අපේ රජතුමා ඒ අතින් කවදාවත් පස්සෙන් හිටියෙ නෑ නෙව. මම දන්නවා එයා පිළිගත්තා අර ස්ටෝර්ම්ස් එන්ඩ්වල ඉන්න කොලුවාව. ස්ටැනිස් උතුමානන්ගෙ විවාහ උත්සවේ දවසෙ රෑ එයා තාත්තා වුන දරුවා. එයාට එහෙම කරනවා ඇරෙන්ට වෙන විකල්පයක් තිබුනෙ නෑ. ඒ දරුවගෙ අම්මා ෆ්ලොරන්ට් කෙනෙක්, සෙලිසෙ ආර්යාවගෙ ලේලි කෙනෙක්. රෙන්ලි කියනවා භෝජන සංග්‍රහය අතරතුරේදි රොබර්ට් ඒ කෙල්ලව උස්සගෙන උඩුමහළට ගියයි කියලා. ස්ටැනිසුයි එයාගෙ අලුත් මනමාලියි පහළ මාලෙ නට නටා ඉන්දැද්දි රොබර්ට් එයාලගෙ මංගල යහන ඉඳුල් කලයි කියලා. ස්ටැනිස් උතුමානන් හිතුවා මේ සිද්දිය එයාගෙ බිරිඳගෙ පවුලේ ගෞරවයට කැළැලක් කියලා. ඉතින් ඒක නිසා මේ කොලුවා ඉපදුනාම එයාව නැවු නග්ගලා එවුවා රෙන්ලි ගාවට." ඔහු නෙඩ් දෙස නෙත් කොණින් බැලීය. "මට තව පොඩි රහසක් අහන්ට ලැබුනා රොබර්ට් නිසා කාස්ටර්ලි ‍රොක්වල වැඩකාර කෙල්ලෙකුට නිවුන්නු දෙන්නෙක් හම්බවුනා කියලා. අවුරුදු තුනකට කලින් එයා ටයිවින් උතුමානන්ගෙ තරගාවලියට ගිය වෙලාවෙ. සෙර්සි ඒ ළමයි දෙන්නව මරවලා දාලා අම්මව වික්කලු ඒ අහලින් පහලින් ගිය වහල් වෙළෙන්දෙකුට. ඒක ලැනිස්ටර් ආඩම්බ‍රේට ලොකු හානියක් වුනාලු ගෙදරට එච්චර ළඟ දි එහෙම දෙයක් වුන එක."

නෙඩ් මුහුණ පුළුටු කරගත්තේ ය. රාජධානියේ විසූ ඕනෑම උසස් වංශාධිපතියෙක් ගැන මෙවන් කතා ගෙතී තිබින. සෙර්සි ලැනිස්ටර් මෙවැනි දෙයක් කරනු ඇතැයි යන්න ඔහු කිසිසේත්ම සැක කල කරුනක් නොවීය... එනමුදු රජතුමා මෙය දැක දැකත් එය සිද්දවීමට ඉඩ හැරියාද? ඔහු දැන සිටි රොබර්ට් එවැන්නක් කිසි දි‍නෙකත් නොකරනු ඇත. එනමුදු ඔහු දැන සිටි රොබර්ට් යනු තමන් දැකීමට අකැමැති දේ නොදකිනු පිනිස දෑස් වසා ගත්තෙකුද නොවීය. "ඇයි ජොන් ඒරින් එකපාරටම රජතුමාගෙ අවජාතකයො ගැන උනන්දුවක් පෙන්නන්ට පටන් ගත්තෙ?"

සුළැඟිල්ලා නැවත වරක් දෙවුර ඇකිළීය. "කවුද දන්නෙ? එයා රජතුමාගෙ හස්තය. සමහරවිට රජතුමා ඇහුවද දන්නෙ නෑ එයාට ගිහින් ඒ දරුවන්ට අවශ්‍ය දේවල් ලැබෙනවද කියලා බලන්ටයි කියලා?"

"ඒක ඊට වඩා වැඩි දෙයක් වෙන්ට ඕන. එහෙමනම් ඇයි එයාව මරලා දැම්මෙ?"

සිය හිසකෙස්වල රැඳි තිබුනු දිය ගසා දැමූ සුළැඟිල්ලා සිනාසුනේය ය. "මම දන්නවා. ඒරින් උතුමානන්ට දැන‍ගන්ට ලැබුනා රජතුමා වේස ගෑනුයි මාළුකාර ගෑනුයි කීපදෙනෙක්ගෙ බඩවල් පුරවලා දාලයි කියලා. ඒ නිසා එයාව නිශ්ශබ්ද කරන්ට සිද්දවුනා. ඒක පුදුමයක් නෙවෙයිනෙ. ඒ වගේ රහසක් දැනගත්තට පස්සෙ මිනිහෙක්ව ඉතුරු කරන්ට බෑ නෙව. ඊළඟ පාර මිනිහා ඒක රට පුරාම පතුරවලා අරියි."

මෙයට දියයුතු පිළිතුරක් නෙඩ්ට සිතාගත නොහැකි විය. එමනිසා ඔහු රවා බැලුවේ ය. වසර ගනනාවකට පසු ඔහුට රේගාර් ටාර්ගේරියන්ව සිහිපත් වන්නට විය. රේගාර්ද නිතරම ගනිකා මඩම්වලට යන්නට ඇත්දැයි ඔහු විමතියෙන් කල්පනා කලේය. එනමුදු එවැන්නක් සිදු නොවන්නට ඇතැයි ඔහු ගේ යටි සිත ඔහුට කීවේය.

මේ වනවිට වර්ෂාව වැඩි වී තිබින. වැහිබිඳු ඉඳිකටු මෙන් දෑසට වැදුනු අතර හඬ නංවමින් බිම පතිත විය. පාර දිගේ කළු දිය දහරාවන් ගලායන අතරේ එකවරම ජොරී කෑගැසීය. "මගේ උතුමානනි!" ඔහු ගේ කටහඬේ අන්තරාය පිරී තිබින. එක මොහොතකදී පාර පුරා සොල්දාදුවන් පිරී ගියේය.

සම් ආවරණ උඩින් පැළැඳි මුදු දම්වැල් සන්නාහත්, යකඩ අත් ආවරණ හා කලවා ආවරණ සහ රන්වන් සිංහයින් මුදුනේ ඇති වානේ ශිරස්ක නෙඩ් නිරීක්ෂණය කලේය. වැසිදියෙන් පෙඟුනු ඔවුන් ගේ සළු පිටට ඇලී තිබින. ඔහුට හරිහැටි ගණනය කරගැනීමට තරම් කාලයක් නොලැබුනු නමුදු එහි ‍සෙබළුන් දසදෙනකු පමණ සිටියහ. දිගු අසිපත් හා හෙලිවලින් සන්නද්ධ වූ පාබල සෙබළුන් පේළියක් පාර අවහිර කරමින් හුන්හ. "පිටිපස්සෙන්." විල් කෑගසනු ඔහුට ඇසින. අසු හැරවූ නෙඩ් ඔවුන් ගේ පසුබැස්ම වළකමින් පිටුපසින් සිටි තවත් සෙබළුන් පිරිසක් නිරීක්ෂණය කලේය. ජොරී ගේ අසිපත සැනෙන් කොපුවෙන් එළියට ඇදී ආයේය. "පාර ඉඩදියවු, නැත්තං මැරියවු!"

"වෘකයො උඩුබුරනවා." සෙබළ මුලුවේ නායකයා පැවසීය. "ඒ වුනාට ඒක බොහොම පුංචි වෘක රංචුවක්."

සුළැඟිල්ලා පරීක්ෂාකාරීව සිය අසු ඉදිරියට ධාවනය කලේය. "මොකක්ද මේ විකාරෙ තේරුම? ‍මේ ඉන්නෙ රජතුමාගෙ හස්තය."

"රජතුමාගෙ හි‍ටපු හස්තය." පාරෙහි වූ මඩ විසින් ලේ රතු පැහැ සෛන්ධවයා ගේ කුර හඬ යටපත් කර තිබින. ඔහු ඉදිරියෙන් වූ සෙබළ මුලුව දෙපසට වූහ. රන්වන් පැහැ සන්නාහ පපු තහඩුවක ලැනිස්ටර් සිංහයා ගොරවමින් නැගී සිටි‍යේ ය. "දැන්, ඇත්තටම කියනවා නම්, මම දන්නෙ නෑ ඌ දැන් මො‍කෙක්ද කියලා."

"ලැනිස්ටර්, මේක මහ පිස්සුවක්." සුළැඟිල්ලා කීය. "අපට යන්ට දෙන්ට. අපි ආපහු බලකොටුවට යන්ට ඕන. ඔබ මේ මොනවා කරනවා කියලද හිතන්නෙ?"

"එයා දන්නවා එයා මොකක්ද ‍මේ කරන්නෙ කියලා." නෙඩ් ශාන්ත ස්වරයෙන් පැවසීය.

ජේමි ලැනිස්ටර් සිනාසුනේ ය. "හරියටම හරි! මම මේ මගේ මල්ලිව හොයනවා. උඹට මතකයි මගේ මල්ලි. එහෙම නේද ස්ටාර්ක් උතුමානනි? එයා අපිත් එක්ක වින්ට්ෆෙල්වල හිටියා. ලා පාට කොණ්ඩෙ, අසමාන ඇස්, මුඛරි කටක්. පුංචි මනුස්සයෙක්."

"මට එයාව බොහොම හොඳට මතකයි." නෙඩ් පිළිතුරු දුන්නේ ය.

"පේන විදියට නම් එයාට පාරෙදි පොඩි අකරතැබ්බයක් වෙලා. මගේ වංශාධිපති තාත්තගෙ හිත හොඳටම රිදිලා. උඹ නිකමටවත් දන්නවද දන්නෙ නෑ කාටද මගේ මල්ලිට අනතුරක් කරන්ට ඕන වෙලා තියෙන්නෙ කියලා, දන්නවද?"

"ඔබේ සහෝදරයාව අත්අඩංගුවට ගත්තෙ මගේ නියෝගය පිටයි. එයා කරපු අපරාධවලට වගඋත්තර බඳින්ට." නෙඩ් කීවේය.

සුළැඟිල්ලා බියෙන් කෑගැසීය. "මගේ උතුමනි-"

සිය දිගු අසිපත කොපුවෙන් මෑත් කරගත් සෙර් ජේමි අසු ඉදිරියට මෙහෙයවීය. "උ‍ඹේ ආයුධේ ඇදගනිං එඩාර්ඩ් උතුමානනි. මට ඕනවුනොත් මම උඹව මරනවා ඒරිස්ව මැරුවා වගේ. ඒ වුනත් මම කැමැතියි උඹේ අතේ ආයුධයක් තියෙද්දි මරන්ට." ඔහු සුළැඟිල්ලා දෙස සාවඥ සිනාවක් පෑවේය. "‍බේලිෂ් උතුමානනි, මම ඔබනං හැකි ඉක්මනින් මෙතනින් පිටවෙලා යනවා මගේ වටිනා ඇඳුම් ආයිත්තම්වල ලේ ගෑවිලා නාස්තිවෙන්ට කලින්."

සුළැඟිල්ලාට තවත් දිරිමත් කිරීමක් අවශ්‍ය නොවීය. "මම නගරාරක්ෂකයො එක්කරන් එන්නම්." ඔහු නෙඩ්ට පොරොන්දු විය. ඔහුට යාම පිණිස දෙපසට වුනු ලැනිස්ටර් සෙබළ මුල ඔහුට පසුපසින් නැවත එකතුවූශ. සිය අසුට සන්කල සුළැඟිල්ලා විදුලි වේගයෙන් වංගුවෙන් හැරී නොපෙනී ගියේය.

නෙඩ් ගේ මිනිසුන් මේ වනවිට සිය අසිපත් ඇදගෙන සිටිමුත් එය විසිදෙනෙකුට එදිරිව තිදෙනෙකු විය. නුදුරෙන් වූ දොරවලින් හා කවුළුවලින් දෑස් යුගල් එබී බලන්නට වූ නමුදු කිසිවකුත් මීට මැදිහත් වන්නට නොසිතූහ. ඔහු ගේ පිරිස අසු පිට නැගී හුන් අතර ජේමී හැරෙන්නට අන් ලැනිස්ටර් සෙබළුන් සතුව අසුන් නොවීය. වේගයෙන් අසුන් ඉදිරියට ධාවනය ක‍ලේ වී නම් ඔවුනට ගැලවී ගත හැකිවනු නොඅනුමාන ය. එනමුදු ඊට වඩා විශ්වාසදායක, ආරක්ෂාකාරී උපායයක් නෙඩ් ගේ සිතට ආයේය. "උඹ මාව මැරුවොත් කිසිම සැකයක් නෑ කැට්ලින් ටිරියන්ව මරලා දායි." ඔහු රජුන් මරන්නාට අනතුරු ඇඟවීය.

ජේමි ලැනිස්ටර් නෙඩ් ගේ පපුවට සිය අසිපත් තුඩ තැබීය. "එයා එහෙම දෙයක් කරයිද? රිවර්රන්වල උදාර කැට්ලින් ටලී තමන්ගෙ ප්‍රාණ ඇපකාරයෙක්ව මරලා දායිද? මම හිතන්නෙ නෑ." ඔහු සුසමක් හෙලීය. "ඒ වුනත්, ගැනියෙක්ගෙ ගෞරවය උඩ මගේ මල්ලිගෙ ජීවිතේ පරදුවට තියන්ට මට ඕන නෑ." ජේමි කනකමය අසිපත නැවතත් කොපුවේ ලෑවේය. "ඉතින්, මම හිතන්නෙ මම උඹට ඉඩදෙනවා රොබර්ට් ගාවට දුවලා ගිහිල්ලා මම කොහොමද උඹව බයගැන්නුවෙ කියලා කෙඳිරිගාන්ට. මම කල්පනා කරන්නෙ එයා ඒක ගනන් ගනීවිද කියලයි." සිය තෙත් හිසකෙස් ඇඟිලිවලින් පීරා හැරි ජේමී අසුට සන් කර නැවත හරවාගත්තේ ය. සෙබළ මුල පසුකල පසු ඔහු නැවත හැරී සෙබළ නායකයා ඇමතීය. "ට්‍රෙගාර්, ස්ටාර්ක් උතුමානන්ට කිසිම අනතුරක් නොකරන්ට වග බලාගනින්."

"එහෙමයි මයෙ උතුමානනි."

"ඒ වුනත්... එයාට කිසිම රිදවීමක් නොකර ‍මෙතනින් පිටවෙලා යන්ට දෙන්ටත් බෑ. ඒ නිසා..." රාත්‍රී අන්ධකාරය හා වර්ෂාව මධ්‍යයේ වුව ජේමි ගේ සිනහව පැහැදිලිව දිස් විය. "උගෙ මිනිස්සු ටික මරපං."

"නෑ!" නෙඩ් ස්ටාර්ක් සිය අසිපත වෙත අත යවමින් මුරගෑ‍වේ ය. විල් කෑගසන හඬ ඇසෙන විටත් ජේමී වීදිය දිගේ සිය අසු හැල්මේ දුවවමින් සිටියේ ය. සෙබළු දෙපසින්ම ඔවුන්ව ‍තෙරපන්නට වූහ. එකෙකු අසු මගින් පාගා යටකල නෙඩ් ඔහුට දෙපසින් වූ රතු පැහැ සෙවනැලිවලට එකපිට එක අසිපත් පහර එල්ල ක‍ලේය. සිය අසුට සන්කල ජොරී කසල් පිම්මේ ඉදිරියට පැන්නේ ය. ලාඩම් ලූ අශ්ව කුර පහරක් වැදුනු ලැනිස්ටර් සෙබළකු ගේ මුහුණ පොඩි පට්ටම් වී ගියේය. තවත් මිනිසකු කරකැවී පසෙකට පැන්න අතර ඊළඟ මොහොතේ ‍ජොරී පිරිසෙන් නිදහස් විය. සෙබළුන් විසින් විල්ව සිය අසු පිටින් බිමට අදින අත‍රේ ඔහු අවලාද හඩක් නැගීය. වර්ෂාව මධ්‍යයේ අසිපත් උස් පහත් විය. ඒ දෙසට පිම්මේ අසු පැන්න වූ නෙඩ් ට්‍රෙගාර් ගේ ශිරස්කය මතට සිය දිගු අසිපතින් පහරක් එල්ල කලේය. පහරේ වේගය කෙතරම් වී ද යත් ඔහුට දත්මිටි කැවුනු අතර මුහුණින් ලේ විදිමින් ට්‍රෙගාර් දණින් වැටින. සිය අසු ගේ කටකලියාව අල්වාගත් දෑත්වලට හේවර්ඩ් විසින් අසිපත් පහර දෙද්දී ඔහු ගේ උදරය හරහා හෙල්ල පහරක් එල්ල විය. හදිසියේම  රත් පැහැ ගත් අසිපත වනමින් ජොරී නැවතත් ඔවුන් මැදට පැන්නේ ය. "එපා!" නෙඩ් කෑ ගැසීය. "ජොරී දුවපාං!" ඊළඟ මොහොතේ පය ලිස්සූ නෙඩ් ගේ අසු පාරේ මඩ මත ඇද වැටින. දෑස් ගිනිකණ වට්ටන වේදනාවක් සමගින් ඔහු ගේ මුවට ලේ රස දැනෙන්නට විය.

ජොරී ගේ අසු ගේ පාද කපා දෑමූ සෙබළු ඔහුව බිමට ඇදගත්හ. පිරිස ඔහුව වටකරගත් අතර අසිපත් ඉහළ පහළ ගියේය. නෙඩ් ගේ අසු නැවතත් නැගිට ගත්තේ ඔහුද ඒ සමග දෙපයින් සිට ගැනීමට තැත් කල මුත් නැවත බිම ඇද වැටින. වේදනාව නිසා මුවින් නැග ආ මුරගැසීම උගුරේ සිරවිය. කැඩුනු අස්ථිය සිය කළව පසා කරගෙන මතු වී තිබෙනු ඔහු දිටීය. ඒ ඔහු දුටු අවසාන දර්ශනය විය. වර්ෂාව දිගටම ඇද හැලෙන්නට විය. නොනැවතීම ඇද හැලෙන්නට විය.

නැවත සිහි ලද එඩාර්ඩ් ස්ටාර්ක් උතුමානන් දෑස් විවර කරද්දී ඔහු සිය මළවුන් සමගින් වීදියේ තනි වී සිටියේ ය. අසු ඔහුට ලං වූ මුත් ලේ ගඳ දැනුනේ පිම්මේ ඉවත දිවගියේ ය. සිය කකුලෙන් නැගෙන වේදනාව නිසා දත්මිටි කමින් නෙඩ් පාරේ වූ මඩ මතින් බඩගාන්නට විය. එයට වසර ගනනාවක් ගතවනු ‍මෙන් ඔහුට දැනින. ඉටිපන්දම් එළියෙන් ආළෝකවත් වුනු කවුළු පිටුපසින් මුහුණු බලා සිටින්නට විය. දොරවල් අතරින් හා පටු මාවත් වලින් මිනිසුන් මතුවන්නට විය. එනමුදු ඔහුට සහය වනු පිණිස ඒ කිසිවකුත් ඉදිරිපත් නොවීය.

සුළැඟිල්ලා හා නගරාරක්ෂක සෙබළුන් විසින් ඔහුව ‍සොයා ගනිද්දී නෙඩ් වීදිය මධ්‍යයේ ජොරී ගේ සිරුර වැළඳගෙන වැලපෙමින් හුන්නේය.

නගරාරක්ෂක සෙබළුන් විසින් කොහෙන් හෝ දෝලාවක් සොයා ගෙනැවිත් තිබින. එනමුදු බලකොටුව දක්වා වූ ආපසු ගමන වේදනාවෙන් පිරි අඳුරු මතකයක් පමණක්ම විය. ගමන අතරතුරේදී නෙඩ් කිහිපවරක්ම සිහිසුන් විය. අරුණෝද‍යේ පළමු මඳ එළියෙන් ඉදිරියෙන් උත්තුංගව නැගී සිටි රතු බලකොටුව ඔහුට දිස්විය. දැවැන්ත ප්‍රාකාරවල ලා රෝස පැහැ ගල් වර්ෂාව නිසා පෙඟී ලේ රතු පැහැ ගැන්වී තිබින.

ඊළඟ මොහොතේ ප්‍රධාන මේස්ටර් පයිසෙල් ඔහුට උඩින් නැමී සිටියේය. කුසලාණක් අතින් ගත් ඔහු සෙමින් මිමිනීය. "මේක බොන්ට මගේ උතුමානනි. වේදනාව නැතිවෙන්ට මේ පොපි යුෂ ටික බොන්ට." ඔහු සෙමින් පොපි යුෂ පානය කලේය. වයින් නටන තුරු රත්කරන ලෙසත් තමා වෙත පිරිසුදු සේද ‍රෙදි කැබැලි ගෙනෙන ලෙසත් පයිසෙල් කිසිවකුට අණ දෙනු ඔහුට ඇසින. ඒ ඔහු දැන සිටි අවසාන දෙය විය.


Lyanna Stark: “Love is sweet, dearest Ned, but it cannot change a man’s nature.”

32 comments:

  1. Replies
    1. // The plot thickens//
      //සිංහයා ගොරවමින් නැගී සිටි‍යේ ය.//

      Delete
    2. Yeah, poor Jorry. Killed himself because of the stupidness of his master..

      Delete
    3. Bur.. please give reasons for your statement...

      Delete
    4. Yeah man. Killed himself? You make it sound like a suicide :P

      Delete
    5. It was indeed a suicide. Ned should've been more cotious. Going out with only 3 guards!

      1. He isn't the Hand anymore.
      2. He got problems with the king.
      3. He knew his wife abducted the Imp.
      4. He knew there will be trouble once that news spread out.
      5. He knew there is some kinda conspiracy against king and himself.

      And this schmuck going out with only 3 guards to protect him. What do u expect Jorry should do? He's the captain of houseguard. He should protect his master at any cost.

      Delete
    6. Well I guess your case is so strong I just have to accept it... :)

      Delete
    7. Ser bur is going Yiddish all of a sudden. Met a shiksa have u ? :P

      Delete
    8. No shiksas mate.. An old rabbi gave me the wisdom.. ;-)

      Delete
    9. Hmmmm no shiksas ? So only Jewish ladies?

      Delete
    10. To go for a Jewish lady I supposed to have & a bar-mitzvah mate. For me to have a bar-mitzvah, my parents supposed to have a ketubah. It's a long tiresome process.. Just forget Jewish ladies... :-P

      Delete
    11. //long tiresome process.. //

      Painful too?

      Delete
    12. Try it for urself and check whether it's painful or not buddy.. Once an old rabbi called Pra Jay told me that "Nothing beats experience." ;-)

      Delete
  2. ඕහ් නෙඩ් මෝඩ නෙඩ්...
    ගොං නෙඩ් මී හරක් නෙඩ්
    මේ ටික වෙනවයි මං කලිංම කීව නෙව
    හිහි

    ReplyDelete
    Replies
    1. බූරු නෙඩ් මැටි නෙඩ්..
      ගොබ්බ නෙඩ් මඤ්ඤං නෙඩ්..

      තව නම් තියෙනවද? :-D

      Delete
    2. නෙඩ්ට විශේෂන පද ගොඩයි :D

      Delete
  3. හැලපෙට කෑම සහ බීම-

    //මංගල යහන ඉඳුල් කලයි කියලා//
    //වේදනාව නැතිවෙන්ට මේ පොපි යුෂ ටික බොන්ට//

    ReplyDelete
    Replies
    1. එත‍කොට වේදනාව ඇතිවෙන්නෙ මංගල යහන ඉඳුල් කලාම වෙන්ටෑ.. :-P

      Delete
    2. Congrats. Bur got it right at the first try.
      Nothing beats experience.

      Delete
  4. ඒදා වගේම අදත් ,අද වගේම හෙටත් හැම ගොරියටම මුල ගැහැණියක බව මගේ නිරීක්ෂන,නිගමන අනුව පෙනි යයි.

    ReplyDelete
    Replies
    1. එසේය මගේ උතුමානනි.. :-D

      Delete
  5. අනේ පව් ..............

    ReplyDelete
    Replies
    1. අශ්වයො නේද? පවු තමා, උංගෙ කකුලුත් කපලා දැම්මානේ..

      Delete
    2. අශ්වයොත් පව් තමා , මෙතනදි පව් කිව්වෙ නෙඩ්ට :(

      Delete
  6. ටීවී සීරීස් එකේ මේ සිද්ධියට අදාල කොටස සෑහෙන වෙනස් කරලා.... ජොරීව මරණ හැටි දැක්කහම ඇඟ හිරිවැටෙනවා.

    ReplyDelete
    Replies
    1. මේ පෝස්ට් එකට දාන්ට පින්තූරයක් හොයන්ට ගිහින් මම මාර කට්ටක් කෑවා.. ඔක්කොම තියෙන්නෙ වෙනස් කරපු පින්තූර.. නෙඩුයි ජේමියි lightsabers වලින් ෆයිට් කරන පින්තූරත් තියෙනවා.. :-D

      Delete
  7. What do you think about the promise ned made to his sister and the sacrifices he made? Proves the most popular theory on the story IMHO. :)

    ReplyDelete
  8. අදනම් සටන් බිමකදී ලේ ගඳ දැනෙන්නේ බෝම්බයක් පුපුරා කීප දෙනෙක් මියගිය/බරපතල තුවාල ලැබූ අවස්ථාවල තමා විශේෂයෙන්. වාහනයක් පුපුරා ගියොත් එහි ඉන්ධන, එන්ජින් ඔයිල්, වලින් සිරුරු නෑවෙනවා. හඳුනාගන්න බැරිතරම් විකෘති වෙනවා. පිළිස්සුනු මස් ගඳ පැතිරෙනවා. මිහිමත අපායක් තමයි දකින්න ලැබෙන්නේ.

    ReplyDelete
    Replies
    1. අද නම් සටන් බිමේ වැඩිපුරම දැනෙන්නෙ වෙඩිබෙහෙත් සුවඳ වෙන්ටැති නේද විචාරක?

      Delete
  9. නෙඩ් වගේ මෝඩයෝ තමයි මගේ වීරයෝ.. හැමදේම කලින් නොදකින පරාජයට බය නැති මිනිස්සු..

    ReplyDelete